Unha das iniciativas do Concello de Pobra do Caramiñal para mitigar o prolongado confinamento das familias nos seus domicilios durante a fase máis rigorosa do Estado de Alarma, vén de chegar ao seu remate. Estamos a falar do servizo de felicitación de aniversarios das nenas e nenos do termo municipal, que foi desenvolvido ao longo das pasadas semanas polos efectivos da Policía Local.
Agora, coa posibilidade de saír á rúa da rapazada da Pobra, e malia que aínda que se albisca lonxe o intre en que poidan xogar nos parques ou reunirse coas súas compañeir@s, medidas extraordinarias como o dito servizo de felicitación déixanse de realizar.
Dende o Goberno local aproveitaron para agradecer o “grande esforzo que tiveron que realizar os axentes da Policía Local para tentar atender a todas as demandas das familias”, que chegaron a ser moi numerosas durante algunhas das xornadas de confinamento. O Concello, neste punto, mostrou o seu desexo de que unha parte dos parabéns achegados tamén vaia dar aos axentes polo “traballo desenvolvido”.
