A xunta de goberno de Ribeira deu luz verde na súa reunión de hoxe ao expediente para a contratación das obras para a construción da nova pérgola da Estación de Autobuses que, cunha lonxitude de 67,75 metros,
servirá de apeadoiro central deste servizo de transporte público e está chamada a ser un novo elemento singular no noso concello Así, segundo consta neste expediente, a actuación ten un prezo de licitación de 246.382 euros, IVE incluído, e un prazo de execución de 9 meses. A infraestrutura estará emprazada na avenida do Malecón, fronte á praza das Heroínas de Sálvora. En breve comezará o prazo de presentación de ofertas.
Segundo o seu proxecto técnico, a infraestrutura estará conformada por cinco grandes bóvedas en forma de tella de 14,35, 13,14, 11,56, 14,91 e 13,79 metros de longo, con alturas que oscilan na parte superior entre os 4,15 e os 4,65 metros. Os arquitectos responsables da mesma, Santiago Rey Conde e Ismael Ameneiros Rodríguez, defínena como “un diseño atemporal, no lineal, con zonas de espera sentadas, espacios abovedados que amplían el espacio, formas alargadas que permiten proyección a gran cantidad de gente”.
