A Unión Europea destaca o compromiso co software libre do Concello de Rianxo

O Concello de Rianxo leva anos apostando pola tecnoloxía sen cancelas: a que se comparte libremente, ceiba do pago de licenzas privativas e ten a vantaxe de poder ser adaptada a diferentes contornas e mellorada en comunidade, unha aposta que segue a manifestarse en diversas iniciativas, como por exemplo a recente adopción do sistema Jitsi para impulsar as vídeo-conferencias e o teletraballo. Na recta final de abril, o proceso rianxeiro de implantación de software libre foi destacado como exemplo a seguir polo Open Source Observatory and Repository (OSOR) da Unión Europea, que publicou unha entrevista co Departamento de Informática municipal.

Tras coñecer a posta en marcha do servidor propio de Jitsi, o sistema libre de vídeo-conferencia, Gijs Hillenius, integrante do OSOR, contactou co Departamento de Informática do Concello de Rianxo para interesarse pola situación do concello en canto á adopción de tecnoloxías libres e de código aberto.

A través dunha vídeo-conferencia-entrevista, Hillenius quixo coñecer os pasos que se deron na implantación do software libre, e ao mesmo tempo achegar as experiencias doutras entidades que tamén apostaron por tecnoloxías sen cancelas con vistas a seren aproveitadas, tamén, polo concello barbanzán.

Sobre a entrevista publicouse un artigo no blog do OSOR.