O Concello de Boiro celebra este xoves 23 o Día do Libros malia os atrancos á actividade presencial e boa parte das canles de acceso tradicional á lectura pechadas até novo aviso. Porén, baixo a premisa de que os libros que temos na casa ou os que podemos adquirir nas redes e compartir online atópanse entre os mellores compañeiros que podemos achar en tempos de confinamento, o Goberno boirense elaborou un programa de actividades do que xa adiantamos algo (o vídeo conmemorativo e colectivo no que participa a Biblioteca Municipal) e que tamén inclúe un convite á cidadanía para compartir en Internet as súas recomendacións literarias.
Este convite foi elaborado polo persoal do departamento de Cultura do Concello de Boiro, que realizou un novo audiovisual con suxestións de lecturas para conmemorar o Día Internacional do Libro. O obxectivo desta iniciativa é fomentar a lectura e animar aos boirenses a que compartan a través das redes as súas suxestións literarias.
Un vídeo, un texto ou unha foto… segundo informa o persoal de Cultura calquera pode enviar a súa recomendación ou compartila a través das redes sociais etiquetando ao Concello de Boiro e empregando o cancelo #libroBoiro, ou enviando a súa recomendación.
