Este 23 de abril é o Día de Libro e ante a adversidade da crise sanitaria e das restricións á actividade presencial, as nosas bibliotecas e a nosa comunidade de lectoras e lectoras fanse fortes para reivindicar o poder curativo dos libros. Iso si, para reivindicalos principalmente nas redes. Esta unión virtual arredor da maxia da lectura e do coñecemento vai conseguir facer historia en diferentes frontes: este ano será o ano en que se celebre o Día do Libro máis dixital e, ademais, será o ano en que se xunten máis bibliotecas para unha iniciativa común: a elaboración dun vídeo colectivo e conmemorativo. Son 31 as que participan na iniciativa conxunta, incluídas as de Boiro, Rianxo, A Pobra do Caramiñal e Noia.
Todas estras bibliotecas públicas municipais, pertencentes á Rede de Bibliotecas da Xunta de Galicia, xuntaron forzas para elaborar o devandito audiovisual “nun momento”, indican, en que “están a traballar dun xeito diferente, coas portas pechadas ao público pero colaborando para fomentar a lectura entre a cidadanía de todas as idades”.
O devandito vídeo, no que participan Migallas e Guadi Galego achegando a parte musical, ten en parte a súa orixe na iniciativa #HoraDoConto, unha actividade conxunta para ofrecer ás familias, todos días ás 17.00 horas dende que se decretou o Estado de Alarma, unha recomendación dun conto e unha lectura (cada día, de luns a venres, unha das bibliotecas é a responsábel de reivindicar unha obra literaria en concreto, en diferentes formatos, formatos, xéneros e idiomas).
As bibliotecas públicas municipais que conforman esta iniciativa son as dos concellos de: Antas de Ulla, Arteixo, A Pobra do Caramiñal, As Pontes, Baiona, Boiro, Caldas de Reis, Chantada, Chapela- Redondela, Coirós, Corcubión, Miño, Mondariz Balneario, Narón, Noia, O Pino, O Saviñao, Ordes, Oroso, Portonovo, Redondela, Rianxo, Ribadavia, Rois, Salceda de Caselas, Salvaterra do Miño, Santa Comba, Sober, Teo, Xermade e Xinzo de Limia.
