Este 22 de abril celébrase a nivel mundial o Día da Terra e as asociacións ecoloxistas da nosa terra vano celebrar malia as restricións á actividade presencial do Estado de Alarma pola pandemia. Farano botando man da Internet, as redes e as posibilidades que estas ofrecen, poñendo o foco na necesidade de reflexionar nos porqués da crise sanitaria que estamos a vivir: unha crise que ten a súa orixe na destrución sistemática de hábitats onde fican latentes e locais patóxenos coma o coronavirus, libres para espallarse pola man do ser humano. As redes van ser o escenario principal das actividades de ADEGA, que celebra o 22 de abril coa iniciativa 50 Poemas de Amor á Terra.
A asociación publicará nas súas redes sociais, dende as 10.00 horas de hoxe até as 20.00 horas, medio centenar de composicións conmemorativas, creadas ou recitadas por socias, socios e simpatizantes da causa ecoloxista.
Na base da celebración atópase o seguinte manifesto resumido: “As actuais circunstancias fan evidente máis que nunca que a Terra e o medio ambiente están no centro da Vida, e que se non contamos con Ela o noso futuro será moi incerto”. Por esta razón, ADEGA convida á cidadanía galega a festexar esta efeméride expresando “a través dos seus foros e redes sociais o amor e a gratitude que senten pola Terra”.
Para facelo, a asociación fará uso do que, nas súas palabras, é “a forma de expresión por excelencia do amor”. Ou sexa, a poesía. Ao longo do día de hoxe ADEGA publicará nas súas redes sociais un total de 50 eco-poemas enviados polos seus socios e socias e simpatizantes para simbolizar o seu amor pola Terra. Os vídeos recompilatorios dos poemas poderanse ver nas contas de Facebook, Twitter e Instagram de ADEGA, e tamén na súa canle de Youtube.
