O Concello da Pobra do Caramiñal vén de facer balance da súa loita contra a fenda dixital local motivada pola falta de recursos tecnolóxicos, formación ou conectividade das familias e agravada, a maiores, pola COVID-19 e o Decreto de Alarma, que, segundo indica o Goberno local, foi abranguendo un tempo moito maior do que estaba previsto e obrigou a facer tarefas de repaso e reforzo “por vía telemática”, dende os domicilios, dos contidos estudados até ese intre.
O resultado foi que unha boa parte dos fogares ficaron fóra deste ámbito de teleformación, “un catro por cento do alumnado do ensino obrigatorio no noso concello”, explican dende o Consistorio, que xuntou forzas (por medio da Concellería de Educación que dirixe Genoveva Hermo) cos centros de ensino para “buscar a maneira de paliar as ditas desigualdades”.
O resultado desta colaboración foi a posta a disposición das familias dos computadores cos que contan os centros educativos, que finalmente resultaron “ser insuficientes para atender toda a demanda”.
Nesta situación o Concello complementou a falta de equipamentos e tamén a ausencia da conexión á Internet facéndose cargo do préstamo de 12 ordenadores portátiles, grazas á colaboración da Concellaría da Mocidade, que cedeu os equipamentos da Casa da Mocidade. Tamén se distribuíron 27 tarxetas de datos, co seu correspondente adaptador, que darán acceso á Internet a tódolos alumnos e alumnas que están nesa situación.
O obxectivo deste traballo conxunto dos centros educativos e do Concello foi “permitir que todo o alumnado poida seguir traballando usando como recurso o ordenador e a Internet, abrindo outras posibilidades para o profesorado, que tratará de suplir con estas ferramentas a imposibilidade das clases presenciais”.
Segundo informou o Goberno local respecto da teleformación inclusiva e integradora, “poñendo os medios para que todos e todas teñan as mesmas oportunidades no acceso á educación”, foi unha “das tarefas máis gratificantes que o Concello pode levar a cabo neste momento”. O Executivo tamén agradeceu a disposición para conseguir os mellores medios para o alumnado da Pobra do Caramiñal por parte do seu profesorado.
