Entre as empresas da nosa terra que máis poden botar unha man estes días de restricións e encerro, medidas derivadas da necesidade de conter o avance da pandemia, sitúanse sen dúbida as operadoras de telecomunicacións. Neste senso, a compañía ribeirense Toxo Telecom non está a ser unha excepción e xa dende a pasada fin de semana puxo en marcha unha serie de iniciativas para mitigar as consecuencias da reclusión e o illamento e, tamén, atender as necesidades extra de teletraballo e comunicación de boa parte da veciñanza dos nosos concellos. “A nosa idea”, sinala o equipo de Toxo, “é aportar o noso gran de area e que isto remate canto antes e sexa o máis levadeiro posíbel para as e os clientes”.
En consecuencia, e malia que oficina de Ribeira ficará até novo aviso pechada, os traballadores da empresa seguirán operativos botando man da fórmula do teletraballo, polo que se garante “que o servizo siga a funcionar con normalidade” e, tamén, “que se poida continuar sen problema atendendo aos usuarios”, a través do 602 247 247, a conta de correo info@toxotelecom.com e os sitios da operadora nas redes sociais Facebook e Instagram.
A empresa tamén acordou que todas as altas de novos clientes que se fagan recibirán a documentación e o SIM sen custe de envío nos seus fogares. A maiores, sinala Toxo, “as clientas e clientes que rematen o seu bono de datos verán como se lles aumenta, se é preciso, cun máximo de 12 GB de maneira gratuíta”.
Amais de todo que vimos de sinalar, Toxo tamén lanzou un paquete directamente encamiñado a contrarrestar as malas novas destes días: unha promoción de 19 GB de datos con chamadas ilimitadas por só 13,95 euros e, como dixemos, envío gratis á nosa casa. Esta promoción compleméntase con outra de 15,95 euros con 22 GB e cunha un algo máis completa de 18.95 euros con 32 GB de datos, ambas con chamadas ilimitadas.
