Segue, co fin de evitar o espallamento do COVID-19, a chuvia de cancelacións de actividades con afluencia de cidadáns. Á longa listaxe de accións aprazadas estes días súmase o debate público sobre as vindeiras eleccións autonómicas que se ía celebrar no Liceo Marítimo de Ribeira, e que ía contar con representantes das diferentes formacións políticas da comarca do Barbanza (PP, PSdG, BNG, Galicia en Común, Compromiso por Galicia), co fin de tratar algúns dos asuntos que máis preocupan á veciñanza dos concellos (infraestruturas, política social, emprego, portos, pesca, etc).
Finalmente, e seguindo as recomendacións de seguridade e protección emitidas polos gobernos central e galego para evitar a proliferación da pandemia, o debate público, que ía ter lugar no Liceo o sábado 21 de marzo a partir das 11.00 da mañá, adíase para, se é posíbel, cando a situación se normalice (e no caso de que siga adiante o proceso electoral ou se aprace tamén para máis adiante).
