O Consistorio de Ribeira será escenario mañá, ás 09.30 horas, dunha reunión de coordinación coa presenza de tódolos xefes de áreas municipais coa finalidade de, logo do estudo das que anunciou hoxe a Xunta de Galicia, concretar as medidas a implantar desde a Administración local co obxectivo de impedir a expansión do coronavirus. Así mesmo, terá lugar unha xunta de voceiros para analizar este tema.
Ditas medidas poderían pasar polo peche de infraestruturas deportivas e outras instalacións municipais, tales coma Biblioteca, Espazo Xuvenil, etcétera; así como pola redución do horario de atención ao público noutras dependencias, podendo afectar tamén á atención domiciliaria e outros servizos.
Unha vez decididas as mesmas, procederase coa súa difusión entre a cidadanía. No día de hoxe xa se tomaron algunhas decisións a este respecto: suspensión do mercadiño dos sábados, agás a parte dedicada á alimentación; ou aprazamento da exposición de gravados de Manuel Ayaso.
