Este mércores 11 de marzo temos en Boiro unha cita cos hábitos saudábeis: rutinas facilmente aplicábeis ao noso quefacer diario para termos mellor calidade de vida. Estamos a falar da conferencia É posible vivir 100 anos sen problemas de corazón, que será impartida polo prestixioso doutor noiés José Ramón González Juanatey, xefe do Servizo de Cardioloxía do Hospital Clínico de Santiago, a amais de catedrático de Medicina da USC. A cita será ás 20.30 horas na Casa da Cultura de Boiro. Porén, segundo informou o Concello, as entradas xa están esgotadas.
O doutor e investigador José Ramón González Juanatey é un dos máis referenciais expertos en saúde cardiovascular da nosa terra, sendo ben coñecidas as súas informacións sobre como garantir e asegurar a saúde cardiovascular en persoas de idade, aínda que poñendo o foco nas metodoloxías preventivas que se poden poñer en marcha dende moito antes de chegar á vellez. González Juanatey é un firme defensor das vantaxes dunha vida saudábel onde resultan fundamentais unha dieta axeitada, a actividade física e unha día a día libre de tabaco e outras substancias prexudiciais.