A Garda Civil do Posto Principal de Boiro detivo a unha persoa como presunto autor de dous delitos de furto de uso de vehículo a motor e tres delitos de roubo con intimidación en grao de tentativa.
Os feitos sucederon a finais da pasada semana cando, en Escarabote, unha furgoneta permanecía acendida mentres o seu condutor facía o reparto, momento que aproveitou o detido para introducirse nela e marchar do lugar. Unha vez chegou á Pobra do Caramiñal, abandonou o referido vehículo e furtou outra furgoneta de reparto, atopándose esta apagada, pero coas chaves no interior da guanteira.
Tras o furto deste vehículo, dirixiuse ao lugar de Virxe do Monte, onde tentou roubar o bolso dunha muller do interior dun automóbil. Despois do forcexo, marchou do sitio sen lograr o seu obxectivo.
Posteriormente, o individuo dirixiuse á zona do cemiterio da mesma localidade, onde tratou de roubarlle a carteira a un varón, ameazándoo cun obxecto apoiado no seu costado, conseguindo a vítima zafarse de el.
De seguido, o detido desprazouse a Ribeira, onde abandonou a furgoneta e subiu a un taxi, solicitándolle ao condutor que o levase ao lugar de Montañó. O taxista trasladouno ao sitio solicitado, indicándolle o viaxeiro que continuase un pouco máis, ao que o condutor lle respondeu que por alí non había vivendas. Nese momento, o detido agarrouno polo pescozo e esixiulle que lle entregase todo o diñeiro que levase enriba, recibindo unha negativa por parte do taxista, comezando entón un forcexo que rematou coa fuxida do ocupante cara ao monte.
A Garda Civil puxo en marcha un amplo dispositivo para a localización e detención desta persoa, logrando o obxectivo tras identificar nas proximidades de Montañó a un varón cuxas características físicas e vestimenta concordaban coas descricións facilitadas polos denunciantes.
A Benemérita procedeu á detención desta persoa como presunto autor de dos delitos de furto de uso de vehículo a motor e tres delitos de roubo con intimidación en grao de tentativa. Ademais, recuperáronse tódolos obxectos e vehículos subtraídos.
O detido, xunto coas actuacións realizadas, foi posto a disposición do Xulgado de Instrución Número 2 de Ribeira.
