Ante a situación sanitaria actual, o goberno local de Boiro decidiu adoptar unha serie de medidas preventivas que atinxen a toda a actividade, sexa da índole que sexa, e que se realiza en calquera das instalacións municipais. A vixencia esténdese desde hoxe, venres 13, e durante un período de 15 días, sempre suxeito á evolución da enfermidade ou ás decisións tomadas polas autoridades sanitarias autonómicas ou estatais.
Ditas medidas, recollidas nun decreto que se lle fixo chegar a tódolos traballadores municipais, abranguen diversos aspectos.
A atención ao público será exclusivamente telefónica en tódolos departamentos dependentes do Concello; e a presencial quedará limitada a casos de extrema necesidade e sempre con previa cita solicitada.
Tódolos centros sociais e culturais e tódalas instalacións municipais permanecerán pechadas, incluíndo as deportivas coma os campos de fútbol, polideportivos e complexo deportivo de A Cachada. Ademais, as actividades culturais, deportivas, sociais ou de calquera outra índole, sexan organizadas polo Concello ou celebradas en instalacións municipais, quedarán canceladas.
Tamén quedan suspendidos os cursos de formación e outras actividades dependentes da Administración local ou celebradas en dependencias municipais, tales coma clases de baile, música, pintura, costura, etcétera.
As cafeterías dos centros sociais municipais permanecerán abertas, pero cun límite de aforo dun terzo da súa capacidade. O que si se suspenden son tódalas citas que se celebran nestes espazos.
Por outra banda, o mercadiño dos martes queda limitado, dispoñéndose unicamente dos postos de venda de produtos de alimentación; mentres que o mercado municipal (praza de abastos) permanecerá aberto pero co aforo limitado a 50 persoas como máximo.
Ademais, as Bibliotecas municipais (A Cachada e Escarabote) permanecerán abertas exclusivamente para préstamo e devolución de libros, polo que non se permite a estancia e aglomeración de persoas.
