Para todas aquelas persoas que non tiveron ocasión de devolver os préstamos das bibliotecas municipais da comarca antes do peche destes centros públicos por mor da propagación do virus e das medidas cautelares para freala, dicirlles que están a chegar mensaxes a respecto a través das redes sociais, de man do persoal das bibliotecas.
Nestas mensaxes faise saber que todos os materiais (libros, filmes, discos) que as usuarias e usuarios teñan retidos nos seus fogares e tiveran data de vencemento estes días quedarán prorrogados de maneira automática, nun principio até o 30 deste mes de marzo. Así nolo fan saber as bibliotecas de Rianxo e Pobra do Caramiñal, pero a medida será aplicábel a toda a rede de espazos de lectura, consulta e préstamo dos nosos concellos.
Por certo que as bibliotecas tamén están a achegar recursos para paliar os efectos negativos do confinamento derivado das medidas de prevención. Así, dende a Biblioteca de Rianxo achegan ligazóns a contos da Biblioteca Virtual Cervantes e lembran a importancia de botarmos man da plataforma GaliciaLé (https://www.galiciale.gal), na que podemos seguir atopando libros para todas as idades, revistas, audiolibros e películas.
As bibliotecas lembran que, malia que non sigan tendo actividade presencial, continúan dando servizo a través das redes sociais, das conta de correo de seu ou dos seus teléfonos habituais.