Os municipios de Arousa Norte sumáronse ao Día Internacional da Muller con numerosas actividades enfocadas na sensibilización, concienciación e reivindicación. Actos organizados tanto polos propios Concellos coma por diferentes colectivos feministas da comarca.
Por exemplo, a boirense praza do Concello deu cabida a unha Verbena feminista da man de Unión de Muchachas, tendo lugar a lectura dun manifesto e actuacións musicais por parte de mulleres; mentres que as rúas da Pobra foron escenario dunha batukada feminista.
En Ribeira, a cita convocada por Mulleres en Acción para a pintura colectiva dun mural feminista non se puido levar a cabo por mor da chuvia, pero si tivo lugar a colocación dunhas ás de pedra, realizadas polo escultor José Caamaño, no monumento das Amas de Casa. Ademais, procedeuse á lectura dun manifesto e fixeron unha petición ao Concello para que as ás poidan perpetuar debido ao seu simbolismo de liberdade e dun futuro cen por cen igualitario no que á práctica dos coidados se refire, hoxe en día levados a cabo principalmente polas mulleres.
Debido á importancia desta data, decidiuse elaborar unha ampla programación que se estendese a máis días do calendario de marzo: homenaxe efectuada en Ribeira ás condutoras e transportistas; os Cafés feministas programados na Pobra; as charlas en Boiro; ou as lecturas en feminino en Rianxo.
