Ribeira homenaxeará no Día Internacional da Muller ás condutoras e transportistas

02 Marzo 2020

O 8 de marzo conmemórase o Día Internacional da Muller e, con tal motivo, Ribeira albergará durante esta fin de semana diversas actividades e homenaxeará ás mulleres condutoras e transportistas do municipio. Así o deron a coñecer esta mañá a concelleira de Servizos Sociais e Igualdade, Ana Ruiz, e a directora do Centro de Información á Muller (CIM), Dolores Crujeiras.

O Concello leva case dúas décadas homenaxeando a mulleres integrantes de diferentes colectivos profesionais e sociais, decantándose nesta ocasión polo das condutoras e transportistas, un sector no que, tal e como sinalou Dolores Crujeiras, o papel feminino permanecía invisible ata hai pouco. Neste senso, conseguiuse contactar cunha vintena de representantes que estarán no salón de plenos do Consistorio o sábado 7, ás 11.30 horas, para protagonizar un evento no que recibirán un obsequio e un diploma conmemorativo. A este respecto, se algunha transportista ou condutora local, presente ou pasada, non recibiu a chamada do CIM pode poñerse en contacto co departamento a través do teléfono 981874131 ou do enderezo electrónico cim@riveira.com.

Máis polo miúdo, a programación organizada directamente polo Concello arrancará o venres 6 coa función teatral Chola, a it girl, da compañía ArtesaCía, que se representará no Auditorio municipal, ás 20.00 horas. A peza ten como protagonista a unha condutora do rural que se fai blogueira e youtuber.

O sábado 7, tras a homenaxe ás condutoras e transportistas prevista para as 11.30 horas, efectuarase na praza do Concello, ás 12.00 horas, unha exhibición de deporte en igualdade materializado en tres disciplinas que ata tempos recentes non se vinculaban socialmente coa muller, tales coma o boxeo, crossfit e kick boxing.

Paralelamente, a través do Departamento de Normalización Lingüística terá lugar na Biblioteca municipal, ás 12.00 horas, un contacontos musicado titulado Lúa triangular. Nada é imposible!, con Eli Ríos e Jara Ortiz. E os actos volverán á praza do Concello, ás 13.00 horas, para proceder cunha lectura poética de versos de Rosalía de Castro.

Finalmente, o propio 8 de marzo, Día Internacional da Muller, desenvolverase a actividade Violetas, consistente en animación de rúa para o empoderamento feminino no que se convidará á cidadanía a expresar o que é unha muller segundo o seu criterio, colgándose en siluetas as distintas respostas. Esta acción estenderase desde as 11.30 ata as 14.30 horas no paseo do Malecón, a praza de Porta do Sol e o parque García Bayón.

Todas estas propostas son de balde e aproveitarase para promocionar o Centro de Información á Muller (CIM) mediante o reparto de distintos obxectos como chapas ou bolsas da compra reutilizables. Así mesmo, o Concello colabora nos eventos organizados por outras entidades coma, por exemplo, a asociación Mulleres en Acción.

Por outra banda, ao longo de todo o ano desenvólvense actividades coeducativas nos diversos centros educativos do municipio. De feito, anunciouse que o próximo curso se realizarán obradoiros en relación á afectividade sexual, destinados aos últimos cursos de Primaria e ao alumando da ESO. Ademais, xa se está traballando en impartir neste 2020 talleres dirixidos a mulleres, coa intención de repetir a experiencia dos tres cursos que se ofertaron o pasado ano enmarcados no programa Artes-Terapias (Coaching e biodanza para o empoderamento feminino, Arte & SaúdeTeatro-Vida para Mulleres) recuperando tamén o de risoterapia.

Outros artigos

O Concello de Ribeira reforza o alumeado público na rúa de Galicia

O Concello de Ribeira informou dun reforzamento do alumeado público nalgunhas contornas do centro urbano da cidade, concretamente no treito da rúa Galicia comprendido entre o Mercado Municipal e o cruzamento co Parque García Bayón. Segundo informaron fontes do...

+

Publicidade

Revista en papel

Opinión

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...

“Good morning, Baltimore”. Antón Luaces

“Good morning, Baltimore”. Antón Luaces

Este xoves foron recuperados outros dous cadáveres supostamente doutros tantos obreiros da maior infraestrutura marítima de Baltimore, considerada a de máis lonxitude de Estados Unidos, que foi derrubada o pasado martes polo portacontedores "Dalí", que bateu contra a...