As veciñas e veciños que por mor da declaración do estado de alarma e do peche dos edificios públicos non tiveran ocasión de devolver os seus préstamos na Biblioteca Municipal de Boiro, a dirección do centro vén de emitir un comunicado no que se lles comunicaba que até que remate a corentena non terán, por suposto, obriga de facelo. Ou sexa, se todo vai ben, até mediados deste mes de abril. Ademais, a Biblioteca lembra que para conseguir un confinamento de lecer, enriquecemento e lectura, nada mellor que conectarnos estes días a plataformas como GaliciaLé (https://www.galiciale.gal) e atopar libros de balde para todas as idades, revistas, audiolibros e películas.
Co fin de permitir a máxima incorporación das familias ao servizo, a Rede de Bibliotecas de Galicia habilitou a posibilidade de dárense de alta desde a casa e acceder así ao catálogo da Biblioteca Dixital na Rede. “Desde aí empréstanse libros electrónicos aos socios/as da biblioteca, e, senón estamos dados de alta, podemos facelo dun xeito provisional mentres dure a corentena”, explica o centro boirense, dándonos conta de todos os pasos que se requiren para facelo.
O devandito comunicado da Biblioteca de Boiro únense aos máis recentes dos centros de Rianxo e Pobra do Caramiñal, que advertiron os días pasados que todos os materiais (libros, filmes, discos) que as usuarias e usuarios teñan retidos nos seus fogares e tiveran data de vencemento estes días quedarán prorrogados de maneira automática até o remate do estado de alarma.
