A quen lle quedara aínda o formigo de mergullarse no Entroido, dicirlle que aínda hai, nos nosos concellos, actividades e citas festeiras nas que poder facelo. Por exemplo en Boiro, que veu cun Febreiro Choqueiro ben cumprido de desfiles, ruadas, concursos e concertos, tal e como fixeron saber na presentación do programa o Concello e máis as asociacións e entidades locais que xuntaron forzas para achegar a axenda máis completa posíbel. Unha axenda que comezou co Concilio de Abadesas e seguiu co Entroido da Boliña, a Festa da Orella, a festa nas rúas de Boiro e o concurso de disfraces e carrozas deste martes, e que culmina este 1 de marzo do Domingo de Enterros.
O Domingo de Enterros tamén vén con novidades, igual que as citas festeiras previas. Por exemplo o tren que vai habilitar o Concello para percorrer o termo municipal e levar a veciñanza e visitantes duns oficios fúnebres a outros, acompañándose a comitiva pola charanga Faíscas da Pontagra. O tren sairá de Boiro pola mañá e percorrerá Abanqueiro, Escarabote e Boiro. A continuación damos conta do planning máis ou menos exhaustivo do roteiro previsto:
Programación do Domingo de Enterros
12.00h – Enterro da Cunca en Praia Xardin
12.00h – Desfile da Asociación Cul. Ent. Crucense en Cabo de Cruz
12.00h – Foliada de Entroido A.C. Pedra da Aroña no porto de Escarabote
16.30h – Enterro do Óso en Abanqueiro
17.00h – Enterro do Felipiño no porto de Escarabote
20.30h – Enterro da Sardiña no Centro Social de Boiro
