Este sábado 29 de febreiro comeza en Boiro a catorce edición do Encontro Arqueolóxico do Barbanza, unha xuntanza de investigadoras e investigadores arredor da importante riqueza patrimonial da nosa comarca en materia de xacementos e, tamén, arredor das posibilidades de estudo, preservación, divulgación e participación que permiten as novas técnicas e tecnoloxías aplicadas a este ámbito de acción. A cita, que vén da man do Centro Arqueolóxico do Barbanza, situado en Neixón, inaugúrase o sábado ás 10.30 horas, na Casa da Cultura de Boiro. A actividade abranguerá o domingo 1 de marzo e a fin de semana seguinte.
O encontro do que forma parte a edición desta finde ten a súa orixe en 2007, cando se puxo en marcha o ciclo para trasladar ao público os resultados dos traballos levados a cabo na comarca do Barbanza. Unha das características fundamentais deste programa é a atención que se lle presta ao arte rupestre e á presentación de investigacións recentes doutras partes de Galicia.
Como dixemos, as actividades realizaranse o 29 de febreiro, durante todo o día; así como na mañá do 1 de marzo, na Casa da Cultura de Boiro, rematando a fin de semana seguinte. Neste senso, o 7 de marzo efectuarase unha visita á Comunidade de Montes de Estacas en Fornelos de Montes co obxectivo de coñecer os traballos arqueolóxicos na Costa do Alén; mentres que o 8 de marzo se procederá cunha visita guiada ao casco urbano de Cuntis para contemplar os vestixios e as termas de orixe romana.
