Boiro acollerá a partir do 29 de febreiro a XIV edición do Encontro Arqueolóxico do Barbanza, unha das actividades do Programa de Encontros Arqueolóxicos que desenvolve o Centro Arqueolóxico do Barbanza, situado en Neixón. Ao acto de presentación da programación asistiron o alcalde José Ramón Romero; a concelleira de Cultura, María Outeiral; e o arqueólogo Víctor Barbeito.
Os referidos encontros xurdiron no 2007 coa finalidade de trasladarlle ao público os resultados dos traballos arqueolóxicos levados a cabo na comarca do Barbanza. Con gran acollida entre os asistentes, unha das características fundamentais deste programa é a atención que se lle presta ao arte rupestre e á presentación de investigacións recentes doutras partes de Galicia. Así mesmo, desvelouse que esta edición traerá novas temáticas, tanto foráneas coma galegas.
As actividades realizaranse o 29 de febreiro, durante todo o día; así como na mañá do 1 de marzo, na Casa da Cultura de Boiro, rematando a fin de semana seguinte. Neste senso, o 7 de marzo efectuarase unha visita á Comunidade de Montes de Estacas en Fornelos de Montes co obxectivo de coñecer os traballos arqueolóxicos na Costa do Alén; mentres que o 8 de marzo se procederá cunha visita guiada ao casco urbano de Cuntis para contemplar os vestixios e as termas de orixe romana.
O programa pretende ofrecer unha oferta centrada no eido do patrimonio cultural, ademais de contar cun plan de avaliación recoñecido no ámbito académico pola Universidade de Santiago de Compostela (USC) e no ámbito formativo pola Consellería de Educación, Universidade e Formación Profesional. No que respecta ás modalidades de matrícula, existen dúas posibilidades: unha libre e gratuíta e outra certificada. Esta última ten un custe de 15 euros, coa que os asistentes reciben a homologación coma curso de formación do profesorado e recoñecemento de créditos para graos ou Programa de Doutoramento da USC.
