Dodro pon en marcha un novo programa dirixido ao seguimento e acompañamento para maiores que viven sós na súa casa. O concello a través do programa “Dodro Escoita” xa contactou por carta con preto de cen veciños que poden acollerse a esta iniciativa .Trátase de persoas maiores que non teñen ningunha prestación ou ficha aberta en Servizos Sociais.
A día de hoxe, dez xa se adheriron á iniciativa, segundo explica o concelleiro de Servizos Sociais e Benestar de Dodro, Xoán Bautista Mariño. Unha vez adherido o proxecto o persoal de Servizos Sociais empezarán a chamar todos os días ás persoas beneficiarias, cun seguimento e control mediante un protocolo a través do que se anotarán as incidencias, valoracións e posterior análise para o estudo de cada caso. Outros concellos interesáronse por este servizo gratuíto.
