Os impulsores da Fundación RIA, da que falamos recentemente para dar conta dos seus encontros en Porto do Son (para presentar o Laboratorio Ecosocial do Barbanza) e en Palmeira (para achegar detalles sobre o seu proxecto de remodelación do paseo marítimo), mantiveron hoxe unha xuntanza co alcalde de Santiago, Xosé Sánchez Bugallo, e máis a concelleira de Urbanismo, Mercedes Rosón, para estudar a posibilidade de facer vindeiras colaboracións en actividades que melloren a calidade de vida da veciñanza compostelá e na creación de mellores espazos urbanos para habitar. Na xuntanza participou (en representación de RIA) o arquitecto inglés afincado en Corrubedo David Chipperfield, fundador e presidente da fundación. Na reunión o Concello propúxolle emprazar a sede da entidade en Compostela, no antigo local da Mancomunidade (na rúa de Oblatas, a carón do río Sarela).
Pola súa banda, Chipperfield lembrou aos representantes do Goberno local as orixes e as principais liñas de traballo da fundación: naceu hai dous anos e medio en Ribeira, da man do seu estudio de arquitectos, urbanistas e investigadores, e centrou nun primeiro intre o seu radio de acción en Santa Uxía, Palmeira, Aguiño e Castiñeiras, na procura de recuperar cadansúas identidades e as súas arquitecturas tradicionais, apostando por recursos que garantisen a máxima integración entre o mar e o tecido urbano. Estas liñas de acción foron paseniño extrapolándose a outras contornas de Barbanza e agora, da man do Concello de Santiago, poderían dar o chimpo á capital de Galicia, o que significaría a súa consolidación definitiva como modelo de aplicación global.
Sánchez Bugallo mostrouse “satisfeito” por recibir a Fundación RIA, á cal “seguimos con atención dende a súa creación”. Tras ter constatado en outubro o seu desexo de ampliar o ámbito de actuación, dixo, “puxémonos a buscar un emprazamento para a súa sede en Santiago e ofrecémoslle a antiga sede da Mancomunidade, no Sarela, un edificio singular que espero sirva de inicio para a súa actividade futura”. En particular, o alcalde agarda contar coa colaboración da Fundación RIA para desenvolver proxectos no ámbito do Sarela e para outras iniciativas da cidade, como as relacionadas coa mobilidade.
Pola súa banda, David Chipperfield, agradeceu a “xenerosidade” do rexedor por facilitar o traballo de procura dunha base de operacións en Compostela, o que non impedirá, sinalou, que as ligazóns con Barbanza e coa ría de Arousa sigan sendo firmes e frutíferas. De feito, entre os seus proxectos futuros atópase achegar propostas para mellorar as relacións de mobilidade de Santiago cos concellos do Barbanza e Arousa Norte.
