Este pasado venres celebrouse en Porto do Son, na sede do Concello, unha nova e ambiciosa iniciativa da Fundación RIA que coordina e impulsa David Chipperfield, o prestixioso arquitecto inglés afincado en Corrubedo. O proxecto non é outro que o Laboratorio Ecosocial do Barbanza e comparte, como indica no seu nome, boa parte do ideario e obxectivos das propostas previas da fundación: pór en valor os tesouros ambientais, paisaxísticos, arquitectónicos, culturais, tradicionais e sociais de Barbanza para acadarmos novas cotas de riqueza social e produtiva dende a filosofía do sustentábel.
Segundo se fixo saber no acto, trátase dun proxecto apoiado por grandes e relevantes entidades: conta con financiamento da Fundación Banco Santander e está impulsado pola Fundación Rede de Innovación Arousa (RIA) en colaboración coa Universidade de Santiago a través do grupo Histagra, contando co respaldo da Cátedra Juana de Vega.
En termos concretos, o laboratorio diríxese a artellar propostas xurdidas da confluencia entre tres elementos que nos tocan de preto: a ecoloxía, as actividades agrícolas e innovación. Como dixemos antes, o proxecto afunde as súas raizames no coñecemento antergo que atesouramos en relación coas actividades produtivas primarias (o agro, o mar) para atopar aí, nesa tradición, respostas para un futuro de riqueza e de respecto polo medio natural. Para isto, propiciarase a colaboración entre axentes de desenvolvemento, grupos de investigadores, empresas innovadoras, comunidades, asociacións e entidades locais.
A iniciativa abrangue dúas fases de actuación: unha de investigación e outra de actividade na que se leven á práctica os achados que se atopen na primeira etapa. Na primeira pescudarase na tradición agrícola e rural para atopar fórmulas susceptíbeis de responder ás demandas presentes. Ao abeiro disto, desenvolveranse tres estudos ligados á comarca, directos, participativos dende o punto de vista cidadá, flexíbeis e abertos. A primeira fase tamén inclúe un atlas de aproveitamentos sustentábeis.
Na segunda fase materializaranse os chamados “Proxectos Semente”, accións sustentadas sobre as investigacións previas con dotación económica de seu.
O proxecto, para fortalecer a súa vertente feita dende o social e para o social, fomentará a participación da veciñanza do Barbanza con distintas canles dixitais de comunicación, como por exemplo un blog que no que se lanzará cada pouco información de actualidade sobre a historia e as posibilidades dos concellos da comarca, sobre as novidades do laboratorio e sobre as accións que estea previsto desenvolver. Na bitácora tamén se publicarán os resultados das diferentes investigacións. Amais do blog, habilitaranse espazos en Facebook e Instagram para o mesmo fin.
O acto
Na cita do venres, dando conta das liñas principais do laboratorio, participaron (entre outros) Manuel Rodríguez, representante de RIA, Álvaro Ganado, da Fundación Banco Santander, e Lourenzo Fernández, investigador do grupo Histagra. Este último fixo saber que o proxecto comezará collendo corpo en tres lugares concretos da comarca, nos que se traballará especialmente: as comunidades de Baroña (Porto do Son), Froxán (Lousame) e Brañas de Laíño (Dodro).
