A reordenación da fronte marítima de Palmeira tratouse nunha xornada de participación cidadá organizada pola Fundación RIA

24 Xaneiro 2020
Cedida

A Fundación RIA presentou ante a veciñanza de Palmeira a análise e diagnose de conflitos do porto e paseo marítimo desta parroquia ribeirense, un proxecto impulsado por Portos de Galicia e asumido pola nomeada entidade. Nesta primeira fase estiveron traballando desde o mes de novembro do pasado ano e agora xa teñen as conclusións que arroxou o seu estudo, ademais de intuír as estratexias a aplicar. Co obxectivo de expoñer o labor desenvolvido ata o momento e recadar valoracións e suxestións que contribúan a mellorar o futuro proxecto, convocaron a residentes e usuarios a unha xornada de participación cidadá que se celebrou durante a tarde do mércores 22 no salón de actos da Casa do Mar da referida localidade.

Respecto da reordenación da fronte marítima, Manuel Rodríguez, coordinador da Fundación RIA, e Alfonso Bertrán, coordinador do proxecto, expuxeron que está xeralmente aceptado polos galegos que a identidade da nosa comunidade se podería definir mediante o binomio maritimidade-continentalidade, “ambas rexións teñen características xeomórficas moi diferentes, é dicir, que se relacionan de maneiras diferentes co seu contexto xeográfico. Esta relación, co seu soporte físico natural, é o que orixina os asentamentos, as actividades económicas e as identidades.”

Tamén manifestaron que, no caso dos asentamentos con porto, esta relación caracterizou o desenvolvemento local chegándose a converter na principal actividade económica. A relación co mar, a extracción dos seus recursos, foi motor e motivo de crecemento de moitos litorais. Nalgúns casos, cando a presión económica derivada das actividades pesqueiras desapareceu, “os asentamentos herdaron unhas grandes extensións de recheo sen uso específico e con pouco continuidade no tecido urbano, sucedendo isto na fronte marítima de Palmeira.”

Deste xeito, a principal finalidade é a planificación e ordenación dos usos do litoral urbano desta parroquia. No que se refire aos obxectivos específicos, atópanse a ordenación do tráfico e o estacionamento, a recuperación do vínculo co mar, e a planificación e deseño do espazo público.

Así mesmo, desde a Fundación RIA apuntaron que existe unha clara relación entre este proxecto e o de integración urbana da AC-305 ao seu paso pola localidade, a pesar de que se desenvolvan de maneira independente.

Con este debate público concluíu a primeira fase do estudo, análise e diagnose da proposta que desenvolve a fundación e que busca coordinar as actuacións entre Portos de Galicia e o Concello de Ribeira.

A esta xornada sumáronse numerosas persoas e entre os asistentes figuraban representantes do Club de Xubilados do Mar, Confraría de Pescadores e comerciantes da zona portuaria; ademais de Adrián Capelo (da Fundación RIA), Juan Antonio Rodríguez (de Portos de Galicia) e o concelleiro palmeirán Emilio Pérez.

Cedida

Outros artigos

Publicidade

Revista en papel

Opinión