Esta madrugada produciuse un incendio nun taller situado no lugar de A Burata, na parroquia rianxeira de Taragoña. O aviso recibiuse ao redor das 02.20 horas e o lume deuse por finalizado ás 05.40 horas. As lapas causaron unicamente danos materiais, afectando ao equipamento do taller e un vehículo que había no interior do mesmo. A vivenda da planta superior viuse afectada só polo fume. Cando o equipo de emerxencias chegou ao lugar, as catro persoas residentes no primeiro andar xa abandonaran o edificio polos seus propios medios a través dunha fiestra e empregando unha escada. Polo de momento, descoñécense as causas que orixinaron o lume.
