O Concello de Boiro clausurou este venres 3 de xaneiro o seu Campamento de Nadal, organizado a través da Concellería de Cultura co obxectivo de fomentar a conciliación familiar durante esta tempada festiva (ou sexa, favorecer alternativas formativas, lúdicas e divertidas para o tempo de lecer das rapazas e rapaces do concello). No campamento, que foi de balde, participaron 75 nenos e nenas entre 3 e 11 anos.
Este venres fixeron acto de presenza no peche da actividade cunha visita ao salón de plenos do Consistorio, onde os recibiu o alcalde, José Ramón Romero, quen lles mostrou o funcionamento do concello e se interesou polas súas opinións e propostas en materia de política local e acción xuvenil.
Ao longo do tempo en que ficou operativo o campamento, as nenas e nenos participaron en actividades e xogos vencellados directamente a estas datas do Nadal, como obradoiros de cociña, bolas de neve, creación dun apalpador articulábel, elaboración de adobíos e tarxetas de Nadal, etc. Asemade, fixeron xogos musicais, deportivos, de mesa e con distintos elementos para fomentar a cooperación e o traballo colectivo.