O Campamento de Nadal que organiza o Concello de Boiro arrancou esta mañá co obxectivo de facilitar a conciliación. Nesta ocasión, conta coa participación dun total de 75 crianzas que durante estas semanas non teñen clase debido ás vacacións propias desta época. Así, este servizo comezou hoxe co obradoiro Pido, pido… con sentidiño promovido pola Oficina de Consumo de Boiro (OMIC), no que os máis cativos aprenderon a importancia de pedir agasallos con responsabilidade no Nadal.
Este campamento desenvolverase nas mañás dos días 23, 24, 26, 27, 28 e 30 de decembro, así como o 2, 3 e 4 de xaneiro, en horario a escoller polas familias: de 09.30 a 13.30 horas ou de 11.30 a 13.30 horas. Os cativos inscritos farán xogos musicais, deportivos, de mesa e outras actividades cooperativas e de participación. Tamén se divertirán con manualidades tales coma aprender a facer tarxetas e adornos de Nadal ou obradoiros de cociña, entre outras.
