A presidenta de Portos de Galicia, Susana Lenguas, mantivo esta semana unha xuntanza con representantes da confraría e do sector bateeiro da Pobra do Caramiñal, durante a cal analizaron a necesidade de realizar reparacións nos pantaláns do peirao para mellorar o servizo aos usuarios. En relación a isto, Lenguas trasladoulles a previsión de acometer reparacións puntuais para atender as necesidades urxentes e de licitar neste ano as actuacións de maior envergadura. Estas incluirán, entre outras, a restitución completa do pavimento dos pantaláns de terceira e cuarta lista, a instalación de torretas de subministro de auga e electricidade, a mellora do alumeado, a eliminación dos fondeos dos finguers e a redistribución de prazas de amarre para adaptalas ás embarcacións actuais.
Así mesmo, abordouse a dragaxe do peirao para favorecer o calado das embarcacións, apuntando a dirixente do ente autonómico que, na súa tramitación, tamén se incorporará a dragaxe do porto comercial.
Outro dos asuntos tratados na reunión foi o relativo á seguridade nas instalacións portuarias. Susana Lenguas sinalou que Portos de Galicia está analizando a viabilidade de posibilidades como a videovixilancia a nivel global. Ademais, falouse doutras cuestións relacionadas co aparcamento de vehículos, a permeabilidade do porto comercial e a regulación do tráfico no peirao.