A experta do IDIS ofrecerá a conferencia “Vivir sen obesidade” para abordar a prevención, a nutrición e as claves para mellorar a calidade de vida
A Pobra do Caramiñal será unha das sedes do ciclo de conferencias “Vida Saudable e Envellecemento Activo”, unha iniciativa impulsada pola Deputación da Coruña que achegará ao municipio especialistas de primeiro nivel co obxectivo de ofrecer pautas prácticas de saúde e fomentar hábitos de vida sans entre a veciñanza.
A vila barbancesa acollerá o peche deste programa no mes de decembro coa conferencia “Vivir sen obesidade”, impartida pola doutora Ana Belén Crujeiras Martínez, investigadora do Sistema Nacional de Saúde e directora do grupo de Epixenómica en Endocrinoloxía e Nutrición do Instituto de Investigación Sanitaria de Santiago (IDIS).
Durante o seu relatorio na Pobra, a investigadora afondará nas causas e factores biolóxicos e ambientais que interveñen no desenvolvemento do sobrepeso e a obesidade. Así mesmo, ofrecerá recomendacións rigorosas sobre alimentación, estratexias preventivas fronte a enfermidades asociadas e pautas para manter a autonomía e o benestar físico ao longo dos anos.
O ciclo provincial ten como foco prioritario achegar o coñecemento médico e científico á cidadanía fóra dos grandes núcleos urbanos, prestando especial atención ás persoas maiores. O presidente da Deputación, Valentín González Formoso, subliñou que “coidar a saúde e previr enfermidades é fundamental para gañar anos de vida, pero tamén para vivir eses anos con maior autonomía e calidade de vida”, destacando a importancia de que todas as persoas teñan ao seu alcance información directa de profesionais de referencia.
Antes de recalar na Pobra do Caramiñal, o ciclo pasará por Cerceda o vindeiro 21 de outubro, cunha ponencia do cardiólogo José Ramón González Juanatey titulada “Como vivir máis de cen anos con saúde”, e por Melide en novembro, onde o oncólogo do CHUS Rafael López abordará a prevención e os tratamentos actuais contra o cancro
