Podemos A Pobra vai organizar este xoves 16 de xaneiro unha asemblea aberta na devandita localidade do Barbanza. A cita, celebrarase na Aula de Estudio emprazada no andar superior da Biblioteca Municipal, a partir das 20.00 horas.
Na reunión prepararanse as liñas traballo para encarar os principais desafíos que se derivan da nova lexislatura estatal e das cada vez máis próximas eleccións autonómicas galegas. “Este ano que comeza”, informa a agrupación, “preséntase cargado de retos importantes que debemos afrontar colectivamente”.
Como dixemos, un dos puntos principais da xuntanza será afondar na materia pendente política que lles toca máis de preto ás galegas e galegos: o desafío de propiciar un cambio de goberno en Galicia e “pór fin a unha década perdida para a nosa terra”, sinalan.
A asemblea deste 16 de xaneiro, un espazo de encontro e debate “para seguir avanzando na consecución dos grandes obxectivos do cambio”, contará coa presenza de representantes de Podemos Galicia.
