Os Reis chegan a Arousa Norte este domingo acompañados de sol

Coa chegada das suas Maxestades os magos de oriente visitando as parroquias de Arousa Norte este domingo día 5 vespera da celebración dos Reis Magos, rematan os actos do Nadal. A continuación podedes ver a axenda de actos e os horarios da visita dos magos a cada un dos concellos do Barbanza: Ribeira, A Pobra, Boiro, Rianxo e Dodro. A previsión metereolóxica apunta a ceo despexado e uns 10-12 graos de temperatura. Así pois bo tempo aínda que algo fresco.

Ribeira.-O redor de 500 persoas están inmersas na organización da cabalgata de Reis que se celebrará en Ribeira o domingo 5, a partir 18.00 horas, unha vez as Súas Maxestades de Oriente cheguen ao recheo portuario de Santa Uxía a bordo do Bus Real, cortesía do Grupo Ferrín, que estivo percorrendo o municipio desde o 10 de decembro. A súa recepción estará acompañada dun espectáculo pirotécnico.

A cabalgata estará integrada por dez carrozas encabezadas por un tren infantil con cincuenta cativos a bordo. No que respecta ás carrozas, en tres delas viaxarán Melchor, Gaspar e Baltasar, mentres que nas sete restantes irán os nenos e nenas de sete entidades locais: Amencer, Alfaia, Aires de Dorna, Francisco Lorenzo Mariño de Aguiño, Amas de Casa de Ribeira, Asociación de Veciños de Carreira e Flor de Toxo. Todas elas estarán engalanadas con temática do mundo dos contos, con referencias a PolgariñoHansen e Gretel ou Alicia no País das Marabillas.

Como acompañamento musical, formarán parte do desfile o grupo de música tradicional Andavía, as charangas Os Santiaguiños e BB+, Fanfarria Furruxa, a banda de Barro e a banda de Cristo de la Buena Muerte de Ferrol. Como novidade, tamén asistirán tres coñecidos personaxes como son Elsa, de Frozen; Woody, de Toy Story; e Peppa Pig.

O itinerario é similar aos últimos anos, pois arrancará do recheo portuario e enfilará polo Malecón ata a rotonda da praza da Concordia, para proseguir pola rúa de Galicia ata a praza de Compostela, rúa Romero Ortiz, novamente Malecón, rúa Rosalía de Castro, rúa Alcalde Fernández Bermúdez, rotonda da Serea, rúa Rosalía de Castro e praza do Concello. Ao longo de todo o percorrido repartiranse entre os espectadores os 1.500 quilos de caramelos aptos para celíacos, 300 máis que o ano pasado. A continuación, os Reis Magos dirixiranse á veciñanza desde o balcón da Casa Consistorial, onde tamén farán o tradicional sorteo de agasallos, para de seguido dirixirse para saudar á rapazada nos soportais onde estarán colocados uns novos tronos feitos para tal ocasión.

Outra das novidades é a recuperación dun Belén vivinte tras 26 anos sen emprender esta acción e grazas á iniciativa da Asociación Alfaia. Este nacemento situarase tamén nos soportais do Concello a partir das 18.00 horas, ata onde se achegarán as Súas Maxestades de Oriente para saudar ao neno Xesús.

Así mesmo, haberá un Punto de Recollida de Nenos Perdidos, servizo que se prestará na Casa do Concello a partir das 17.30 horas. Do mesmo xeito, no entorno da praza do Concello haberá un Punto de Auxilio de Protección Civil para atender calquera incidencia.

A pesar de que a cabalgata partirá de Santa Uxía ás 18.00 horas, nesa mesma xornada e desde ben cedo, o Bus Real, cos Reis Magos de Oriente a bordo, visitará as parroquias repartindo caramelos entre todos aqueles que os vaian recibir. As paradas que realizarán Melchor, Gaspar e Baltasar son ás 10.00 horas na rúa das Delicias de Corrubedo; ás 10.45 horas na Casa da Cultura de Olveira; ás 11.30 horas no Centro Social de Oleiros con visita ao Hospital da Barbanza; ás 12.30 horas no porto de Palmeira; ás 13.30 horas no porto de Castiñeiras; ás 16.00 horas na Aula de Música de Aguiño; ás 16.45 horas na Capela da Guía de Carreira; e ás 17.30 horas no Centro Recreativo de Artes.

Os Reis, despois de repartir de madrugada os agasallos ós nenos, acudirán o luns día 6 á Igrexa Parroquial de Santa Uxía Riveira. Será as 12 da mañá durante a celebración da Eucaristía e posteriormente os nenos que o queiran poderán saudar ás súas Maxestades.

A Pobra.- Este concello prepárase para recibir ás Súas Maxestades de Oriente na cabalgata que se celebrará o domingo 5 e que contará coa participación de ao redor de 100 persoas na súa organización.

A saída do desfile está programada para as 17.30 horas desde o polideportivo situado na rúa Venecia e enfilará polo paseo do Areal ata o portal de Belén, na praza Maior. Despois continuará pola rotonda da Covecha cara as rúas Díaz de Rábago e da Paz para concluír o itinerario na Casa do Concello, onde terá lugar a recepción de Melchor, Gaspar e Baltasar. En total, repartiranse 1.500 quilos de caramelos aptos para celíacos.

Como acompañamento musical, formarán parte desta cita os grupos Batukabras, Trécola, A. C. Eiradela e Xiada. Colaboran Asociación de Amas de Casa, Consumidores e Usuarios Caramiñas e Autocares Barbantia.

Boiro.- Melchor, Gaspar e Baltasar visitarán Boiro o domingo 5 na cabalgata de Reis organizada polo Concello e a Asociación Comisión Parroquial de Santiago de Lampón. Unha cita que incorporará novidades e na que participarán ao redor de 400 persoas entre as oito carrozas que compoñen o desfile, percorrendo un quilómetro de distancia xunto con diversos grupos e bandas de música. Así o deron a coñecer esta mañá  o alcalde José Ramón Romero; o concelleiro Marcos Fajardo; o párroco de Lampón, Marcelino Sánchez; e varios membros da organización.

A cabalgata estará encabezada por unha carroza co Belén vivinte, seguidas das tres dos Reis Magos, outras tres de camelos e unha final dun parque cunha fonte luminosa. Como acompañamento musical, tomarán parte nesta cita a Banda Municipal de Música de Boiro, Banda de Cornetas e Tambores da OJE de Ferrol, charanga O Equipo B, grupo Arume e grupo Os Caraveiros, entre outros.

A saída está programada para as 16.30 horas desde a Magdalena, chegando a Boiro ao redor das 17.30 horas. Este ano decidiuse adiantar o horario co obxectivo de que tódolos nenos e nenas poidan saudar ás Súas Maxestades de Oriente sen ter que agardar demasiado, segundo explicou o edil Marcos Fajardo. Ademais, inclúese un tramo sen música para que poidan desfrutar aquelas persoas con Trastorno do Espectro Autista (TEA). Concretamente será na rúa Principal, desde o cruce da avenida de Compostela ata a rúa Salvador Allende. Ao longo de todo o itinerario repartiranse entre os espectadores en torno a 900 quilos de caramelos aptos para celíacos.

Unha vez cheguen á praza do Concello, os Reis Magos, acompañados polo rexedor José Ramón Romero e a concelleira de Cultura, María Outeiral, saudarán á veciñanza desde a entrada da Casa Consistorial. A partir das 18.00 horas, disporase dentro do edificio dunha plataforma cos tronos onde Melchor, Gaspar e Baltasar atenderán aos cativos, tendo incluso a oportunidade de sacarse unha foto con eles. Chegadas as 19.00 horas, partirán cara Escarabote pola rúa peonil, arribando á parroquia media hora máis tarde. O evento rematará coa Misa no Centro Social ás 21.00 horas.

Ademais, outra das novidades é a eliminación da presenza de cabalos no desfile coa finalidade de evitar incidencias e garantir a seguridade.O Grupo Outeiral colabora poñendo varios autobuses a disposición da cabalgata sen cobrar nada, tal e como apuntou o párroco Marcelino Sánchez.

Rianxo.- Os Reis chegarán por mar a Rianxo para, sobre as 18.30 horas, liderar un desfile que contará con cinco carrozas. Unha empresa de animación participará no percorrido, achegando orixinais elementos mariñeiros feitos con globos, como unha traiñeira de seis metros, un barco de papel de catro metros, dúas piraguas, un polbo ou un caballito de mar. A charanga Vai de Roda e a banda de gaitas Buxaina animarán a camiñada, que culminará na praza Castelao, onde Fogo Fatuo montará un belén vivente, con música tradicional incluída. A cabalgata incorporará elementos realizados nun taller de cartón pedra, como unha balea e unha solla.

Dodro.– A cabalgata de Reis estará neste concello a partir das 20 horas. A presenza das suas maxestades será no Pavillón Polideportivo Municipal e os nenos terán inchables, mascotas, caramelos, taller de manualidades, agasalllos e chocolate con churros.

Os Reis Magos chegan á parroquia de Santa Uxia o dia 6 de xaneiro