Desde esta mesma xornada, martes 10, circula polas estradas do municipio ribeirense o Bus Real. Trátase dunha iniciativa que, por segundo ano consecutivo, pon en marcha o Concello coa colaboración do Grupo Ferrín co obxectivo de promocionar o programa Riveira MOVe, así como brindar á veciñanza a posibilidade de achegar aos Reis Magos o 5 de xaneiro a tódalas parroquias, antes da cabalgata pola cidade. Á presentación asistiron a concelleira de Cultura, María Sampedro; o seu homólogo de Mobilidade Cidadá, Víctor Reiriz; e Manuel Ferrín como responsable da citada compañía de transporte.
O autocar en cuestión está decorado con motivos propios do Nadal e o lema Os Reis Magos viaxan coa Tarxeta Riveira Move. Ademais, o rei Melchor sostén unha das tarxetas azuis Riveira Move que, grazas á subvención do Concello, fan que cada desprazamento para o usuario custe 1 euro, supoñendo un desconto de 30 ou 40 céntimos sobre o prezo real dependendo da liña.
O 5 de xaneiro, o Bus Real, cos Reis Magos de Oriente a bordo, visitará as parroquias, repartindo caramelos e sorteando un agasallo sorpresa entre tódolos cativos que os vaian recibir. As paradas que realizarán Melchor, Gaspar e Baltasar son ás 10.00 horas na rúa das Delicias de Corrubedo; ás 10.45 horas na Casa da Cultura de Olveira; ás 11.30 horas no Centro Social de Oleiros con visita ao Hospital da Barbanza; ás 12.30 horas no porto de Palmeira; ás 13.30 horas no porto de Castiñeiras; ás 16.00 horas na Aula de Música de Aguiño; ás 16.45 horas na Capela da Guía de Carreira; e ás 17.30 horas no Centro Recreativo de Artes.
