Luís Bará, deputado do BNG no Parlamento de Galicia, defendeu unha proposición non de lei, na comisión de Medio Ambiente, para desbloquear o proxecto da retirada e tratamento dos lodos contaminantes da dragaxe da canle do río Lérez. Bará indicou que o acordo aprobado por unanimidade no Parlamento galego, no mes de xuño, “non se está a cumprir”, polo que pediu o seu desbloqueo e iniciar un estudo que inclúa os custes.
O deputado do BNG denunciou os “máis de dez anos liando o palangre por parte do Partido Popular”, o cal, segundo afirmou, continúa “buscando escusas” para non executar o proxecto, engadindo que eses lodos “non poden ir para calquera lugar e menos para o mar.” Bará recriminou que a Xunta utilice o mar “como un vertedoiro no que cabe todo tipo de residuos” e cualificou como “disparatada” a medida de depositar os vertidos nun punto próximo á illa de Sálvora, unha disposición rexeitada polo sector pesqueiro e marisqueiro de Arousa. Así, o deputado do BNG incidiu en que a solución pasa polo “tratamento en terra.”
Bará reiterou que no acordo parlamentario “o Parlamento instaba á Xunta a elaborar, conforme a normativa vixente e ás directrices existentes respecto deste tipo de actuacións, unha proposta alternativa e sustentable para o depósito de materiais procedentes do dragado do río Lérez, de tal forma que se garante que estes non afectarán a ningunha das rías galegas, en especial á ría de Arousa.” Tras o acordo unánime acadado no Parlamento, Bará anunciou que o BNG estará “moi vixiante e exixente” para o seu cumprimento coa máxima axilidade, ademais de insistir no peche definitivo da posibilidade de “verter as lamas nalgunhas das rías nin preto de Sálvora”, polo que remarcou o tratamento en terra como única alternativa.
