A Carpa dos Soños de Boiro, o centro neurálxico das celebracións deste Nadal no concello boirense, vai pechar este sábado as súas actividades. E farao ao grande: con agasallos e música, a partir das 19.00 horas.
Segundo informa o Concello, na cita de clausura sortearanse finalmente os agasallos da Asociación Boirense de Empresarios (ABE) entre todas as cartas depositadas na caixa de correos para os Reis de Magos. A continuación, sobre as 19.15 horas, está prevista a actuación de Cé Orquestra Pantasma a xeito de colofón musical de dúas semanas plenas de actividades de lecer e conmemorativas.
A Carpa dos Soños abriu as súas portas o sábado 21 decembro, coa actuación do combo de guitarra da Escola de Música de Boiro. Durante os días en que ficou aberta acubillou mancheas de actividades para os máis cativos, a través da súa ludoteca e de numerosos espectáculos e actuacións. Por exemplo a obra Cociñando Música da man de Capitán Garfo, a visita do Apalpador itinerante, o espectáculo de Circo Chosco (Riscando o ceo), Superhate de Patty Diphusa ou as cancións do libro -disco Radio Bulebule de Paco Nogueiras (que volveu a Boiro logo da súa exitosa actuación o pasado verán). No que respecta á ludoteca, a súa actividade arrancou o 23 de decembro da man do Concello e a Asociación Boirense de Empresarios (ABE).
