A boirense praza do Concello albergará durante este Nadal a Carpa dos Soños, onde se desenvolverán actividades para os máis cativos coa ludoteca e numerosos espectáculos e actuacións. A inauguración deste espazo celebrarase o sábado 21, a partir das 18.00 horas, cunha actuación do combo de guitarra da Escola de Música de Boiro.
A referida carpa será escenario durante esta época dunha serie de citas gratuítas destinadas a tódolos públicos. Así, Cociñando Música chega o luns 23, ás 19.15 horas, da man de Capitán Garfo; o xoves 26, á mesma hora, será a quenda do Apalpador itinerante e contacontos; a animación na rúa correrá a cargo de Fantasía o venres 27, a partir das 18.00 horas; e Circo Chosco traerá Riscando o ceo o sábado 28, ás 19.15 horas.
Recentemente estreado o 2020, a inicios do mes de xaneiro, Superhate de Patty Diphusa recala o xoves 2, ás 19.15 horas; Paco Nogueiras desenvolverá o Radio Bulebule o venres 3, á mesma hora; e o sábado 4 a festa vén con Cé Orquestra, ás 19.15 horas.
No que respecta á ludoteca, esta arrancará o 23 de decembro, promovida polo Concello xunto coa Asociación Boirense de Empresarios (ABE). Para participar é preciso presentar un ou varios tíckets de compra por un importe superior a 20 euros, permanecendo aberta os días 23, 24, 26, 27, 28 e 30 de decembro, así como o 2, 3 e 4 de xaneiro, en horario de 17.00 a 19.00 horas.
