Prosegue a celebración dos 20 anos do Centro Social de Boiro con máis vídeos e actividades

As dúas décadas de intensa traxectoria dinamizadora do Centro Social de Boiro seguen a xerar actividades e celebracións, logo das presentadas os días pasados e das que falamos polo miúdo en O Barbanza, entre as que se inclúen o redeseño dos seus espazos (unhas instalacións que reciben cada ano máis de 70.000 visitas, entre a aula de estudo, as escolas de música e baile, a sede da Cruz Vermella ou os espazos formativos, entre outros reclamos) e o lanzamento dun arquivo dixital. A celebración estase a acompañar dunha serie de lanzamentos en YouTube, na canle do CS boirense, que inclúen imaxes e vídeos do traballo desenvolvido durante estas dúas décadas.

Onte mesmo lanzouse outra peza audiovisual: un dinámico percorrido de dous minutos e medio de duración polas súas importantes contribucións culturais e cidadás. No vídeo, Antón Seijas (usuario do centro e opositor) e Samuel Rodríguez (axente TIC) lévannos da man polo pasado, o presente e o futuro do centro social. Previamente, as encargadas de ofrecer os seus puntos de vista sobre estes 20 anos (e os que quedan) foron Rosa Saavedra (usuaria do centro) e Juan Ortega (profesor da Escola de Música), por unha banda, e María Lapido (profesora de Secundaria), Paula Tubío (psicóloga e docente) e Montse Carro (profesora de baile tradicional), pola outra. Todo apunta a que as celebracións seguirán deparándonos máis contidos ao longo dos días vindeiros.

Máis accións

Este incremento dos contidos dixitais xerados polo CS estase a complementar, co gallo das conmemoracións das dúas décadas de andaina, cun redeseño e unha adaptación dos seus espazos cara as novas (e vindeiras) necesidades da veciñanza. Así, procedeuse á remodelación da aula de estudo e redistribuíuse a sala de exposicións, complementándose agora cun espazo de coworking (traballo colaborativo) e zona de lectura.

Desde o Concello boirense manifestan que se está a barallar a posibilidade de abrir unha nova área destinada a adolescentes, xa que opinan que “é un treito de idade que carece de espazos públicos pensados especificamente para eles”. Para co-deseñalo estase a a traballar conxuntamente co alumnado dos colexios locais para que sexa a propia rapazada a que “elabore as maquetas de como vén as zonas municipais destinadas á súa idade e as necesidades que detectan”.