O Centro Social de Boiro cumpre 20 anos e celébrao cun redeseño dos seus espazos e o lanzamento dun arquivo dixital. Unhas instalacións polas que pasan anualmente máis de 70.000 persoas, entre a aula de estudo, as escolas de música e baile, Cruz Vermella, cursos de formación e outras moitas actividades culturais.
Así, estrearase unha canle de Youtube na que se recompilarán imaxes e vídeos do traballo feito durante estas dúas décadas, contendo momentos de numerosas actividades que se desenvolveron ao longo do tempo.
Por outra banda, as áreas do Centro Social estanse a redeseñar para adaptarse ás novas necesidades de cara ao futuro. Neste senso, procedeuse á remodelación da aula de estudo e redistribuíuse a sala de exposicións, complementándose agora con espazo coworking e zona de lectura. Desde o Concello boirense manifestan que actualmente tamén se está pensando nunha nova área destinada a adolescentes, xa que consideran que é un tramo de idade que carece de espazos públicos pensados especificamente para eles. Para co-deseñalo, o 10 de decembro, ás 12.00 horas, realizarase no propio Centro Social unha actividade con rapazada de sexto de primaria do CEIP Santa Baia, na que será o propio alumnado o que elabore as maquetas de como ven as zonas municipais destinadas á súa idade e as necesidades que detectan.
