Este venres 13 de decembro a tempada festiva do remate do ano vai ter unha cita destacada no concello de Boiro. Estamos a falar da nova edición do Evento Gastronómico do Nadal, que se se celebra no local multiusos do Mercado Municipal a partir das 11.00 horas, da man do Concello e do Obradoiro de Emprego Hostalería Boiro III.
Na cita, as e os participantes neste obradoiro convidarán á veciñanza a degustar doces elaborados de maneira artesanal no seu centro de formación, ademais de cafés e chocolates. A degustación dos produtos será de balde até esgotar as existencias.
O Obradoiro de Emprego Hostalería Boiro III está a achegar formación a 16 alumnos do concello a través de dúas especialidades docentes. Participan, dende setembro, mozas e mozos de entre 18 e 30 anos, inscritas/os no Sistema Nacional de Garantía Xuvenil, co obxectivo de mellorar a súa cualificación e inserción laboral. A iniciativa ten a súa orixe na alta taxa de empregabilidade que mostra o sector da hostalaría, que require persoal cualificado para desenvolver funcións en calquera das distintas disciplinas do sector.
