A finde boirense de ocio e compras destes días pasados vai ter continuidade esta seguinte fin de semana, co engadido extra de coincidir con dous importantes festivos. Entre unha e outra data, o sábado 7 promete ser unha xornada grande en materia festiva e de reivindicación do comercio local e de proximidade. As actividades, segundo informa o Concello de Boiro, chegarán a partir das 17.00 horas, coa inauguración do Belén municipal no local da Praza de Abastos.
O programa de benvida do Nadal proseguirá ás 17.15, cunha actuación musical itinerante a cargo de Brassica Rapa. Máis tarde, ás 18.00 haberá unha sesión de xogos inclusivos coa Asociación Amigos, na rúa Peonil.
Por certo que os integrantes da dita asociación serán os encargados, arredor das 19.00 horas, de levar a cabo o prendido oficial das luces de Nadal.
As actividades proseguirán ás 19.15 horas, cunha actuación a cargo da Banda Municipal de Música de Boiro. De xeito complementario, arredor das 19.30, está previsto que recomece a xeira musical itinerante de Brassica Rapa.
En palabras do Concello, a xornada festiva do 7 de decembro será unha oportunidade inmellorábel para darmos a benvida á festividade do Nadal, ao tempo que desfrutamos do ambiente festivo nas rúas, os comercios e os bares e reivindicamos, deste xeito, a saudábel práctica de apostar polos establecementos que temos ao alcance da man: os negocios de proximidade que dan apoio e riqueza ás novas vilas.
