O RianxoCiencia 2019 segue coa súa programación ao longo de novembro no marco simbólico do mes da ciencia e baixo a premisa da cultura científica, técnica e da innovación como piar inescusable do desenvolvemento sociocultural da cidadanía. Esta iniciativa contempla numerosas actividades de balde enfocadas na promoción e divulgación da cultura científica e técnica.
Así, o obradoiro A ciencia nos tempos de Castelao, Dieste e Manuel Antonio chega á Biblioteca municipal o venres 22, ás 18.00 horas. Esta actividade focalízase nun público de 6 a 12 anos, contando con 25 participantes, previa inscrición.
Por outra banda, o sábado 23 desenvolveranse dúas citas no salón de actos do Auditorio. A primeira, programada para as 12.00 horas, será Discurshow: Orbitamos! impartida por Vicente Mohedano e dirixida a rapazada a partir de 8 anos. A segunda, ás 19.00 horas, o director do Observatorio Astronómico da Universidade de Santiago de Compostela (USC), José Ángel Docobo, ofrecerá unha charla-coloquio titulada As estrelas e os seus sistemas planetarios (e outras cousas que pasan -ou non pasan- no ceo).
Ademais, a sala de exposicións do Auditorio alberga ata o 30 de novembro a mostra 50 aniversario da chegada do home á lúa.
