O programa RianxoCiencia 2019, un completo programa de obradoiros, charlas-coloquio, demostracións científicas e exposicións para espertar o meirande número de vocacións e talentos investigadores locais entre as novas xeracións (especialmente), inaugúrase este 9 de novembro nos baixos da Biblioteca, cun Obradoiro de Robótica artellado en dúas sesións (a primeira de 10.00 a 11.30 horas, para nenas e nenos de 9 a 12 anos, e a segunda en horario de 12.00 a 13.30 para rapazas e rapaces de entre 13 e 16 anos). O taller de sistemas intelixentes contará finalmente con 18 persoas.
RianxoCiencia é un programa organizado polo Concello co apoio da Deputación da Coruña e a Universidade de Santiago, entre outras entidades. Ao longo dos seguintes días, até final de mes, irá dando acollida a unha serie de accións divulgativas e participativas. Por exemplo a cita do 16 de novembro, no Auditorio de Rianxo: un discurshow (o espectáculo científico Voute contar!) da man de Vicente Mohedano, para crianzas de oito anos en adiante.
Máis tarde, ás 19.00 horas está programada a charla coloquio Ciencia e razón fronte ás pseudociencias, terapias perigosas e outras lerias, impartida por Manuel Rey, xornalista e colaborador habitual da web GCiencia.
O venres 22 de novembro, na Biblioteca Pública celebrarase o obradoiro A ciencia nos tempos de Castelao, Dieste e Manuel Antonio, para nenas e nenos de entre 6 e 12 anos, cun límite de dúas ducias de participantes.
O día 23 haberá dúas actividades: un novo discurshow ás 12.00 horas a cargo de Vicente Mohedano (o espectáculo Orbitamos! para nenas e nenos de 8 anos en adiante) e unha charla, a partir das 19.00 horas, sobre as estrelas e os seus sistema planetarios, impartida polo astrónomo José Ángel Docobo, director do Observatorio Astronómico da Universidade de Santiago.
Na xornada do 30 de novembro está previsto no Auditorio un obradoiro sobre A maxia da ciencia en dúas sesións, a primeira a partir das 10.00 para crianzas de 9 a 12 anos e a segunda a partir das 12 horas para a rapazada de entre 13 e 16 anos.
As devanditas actividades complementaranse coa exposición 50 aniversario da chegada do home á Lúa, do Observatorio Astronómico da USC, na sala de mostras do Auditorio de Rianxo entre os días 25 e 30 de novembro.
