A Xunta apoia a construción do novo Auditorio de Ribeira e a compra do local para a Biblioteca

A conselleira de Medio Ambiente, Territorio e Vivenda, Ángeles Vázquez, e o alcalde de Ribeira, Manuel Ruiz, asinaron esta mañá senlleiros convenios de colaboración para levar a cabo actuacións en materia de infraestrutura cultural e social.

Un deles permitirá a construción do novo Auditorio de Ribeira, unha infraestrutura cultural que será un referente para toda a comarca, segundo expuxo Ángeles Vázquez, e para o que hoxe se deu o primeiro paso, coa sinatura do convenio cun importe de case 130.000 euros que permitirán facer fronte aos gastos derivados da redacción do proxecto básico e de execución desta infraestrutura e que asume ao 100% a Consellería de Medio Ambiente, Territorio e Vivenda.

Así mesmo, a conselleira explicou que a Xunta de Galicia apoiará ao Concello na execución das obras que teñen un orzamento estimado de 2’8 millóns de euros, polo que o investimento da Consellería neste proxecto se elevará a 500.000 euros nos vindeiros anos. Indicou que esta colaboración tamén posibilitará a mellora do espazo contiguo para poñer en valor esta zona de Ribeira e ofrecer ao veciñanza e visitantes espazos de esparexemento e puntos de encontro cultural.

O segundo dos convenios rubricados permite ao Concello de Ribeira beneficiarse do programa Fondo de Cooperación, posto en marcha polo Instituto Galego de Vivenda e Solo (IGVS) de xeito que os concellos acceden a préstamos sen xuros. Neste caso concreto, o importe ao que accederá Ribeira é de 245.000 euros, facilitando ao Concello adquirir e rehabilitar un inmoble que acollerá a Biblioteca municipal e unha aula de estudos.

A conselleira destacou que con esta iniciativa o Concello non só está dotando de servizos, senón que tamén está a coidar, rehabilitar e conservar o patrimonio construído do municipio. Neste senso, lembrou que Ribeira xa se beneficiara deste programa do IGVS en 2018, para levar a cabo o acondicionamento da envolvente térmica e reforma interior do edifico da Unidade de Atención á Drogodependencia (UAD), para o que se lle concedeu un crédito de case 520.000 euros.

Finalmente, agradeceu o esforzo do Concello e salientou o labor que está desenvolvendo a Xunta de Galicia “de cooperar e tender a man aos concellos para que repercuta na cidadanía, na mellora deses servizos que son fundamentais para o rexurdir das nosas vilas, dos nosos pobos, e ter os mellores dos servizos tal e como nos merecemos.”

Pola súa parte, o rexedor Manuel Ruiz expresou o seu agradecemento á Xunta de Galicia e, nesta ocasión, á Consellería de Medio Ambiente, Territorio e Vivenda, manifestando que “en todas as accións da Xunta de Galicia está presente Ribeira. Cada vez que Ribeira ten unha necesidade, sempre temos esa deferencia do Goberno galego de escoitarnos e despois, na medida das súas posibilidades, prestarnos unha axuda”, sendo este o caso para a materialización das dúas instalacións referidas. Tamén apuntou a que, ás veces, os concellos “somos os grandes olvidados da financiación do Estado. Para calquera infraestrutura que practicamente supere a mera conservación, pois necesitamos a axuda de outras administracións.”