Despois de que a fin de semana pasada arrancase en Boiro a quinta edición da ruta + que tapas, agora é a quenda de Rianxo. Así, o itinerario gastronómico poderá realizarse polo municipio rianxeiro a partir do venres 15, desde as 20.00 ata as 23.00 horas, así como o sábado e domingo, en horario de 12.00 a 14.00 horas e de 20.00 a 23.00 horas. Un dous engadidos desta proposta é a presenza do soumiller Juan Figueroa Treus, natural de Escarabote e residente en Vigo, quen aconsellará aos clientes sobre os viños que poden acompañar con cada petisco. Así mesmo, como actividade complementaria na xornada do venres levarase a escena a peza Casa O’Rei, de Ibuprofeno Teatro. A cita desenvolverase na Sala Arcos Moldes do Auditorio municipal, ás 21.00 horas.
O prezo da tapa establécese nos 2’50 euros e os establecementos de Rianxo que toman parte nesta iniciativa son O Vilar, Toskana, O’Costillar, Castelao, A Lareira, O Asador, O Paseo e Plaza.
Cómpre destacar que os catro primeiros clientes en pedir un petisco nalgún dos locais anteriormente enumerados durante o día de apertura da ruta, terán como premio unha entrada para o monólogo de El Sevilla que se celebrará o 14 de febreiro de 2020 en A Pousada da Galiza Imaxinaria, no municipio de Boiro. Ademais, tódolos participantes entran nun sorteo de catro bonos gastronómicos e un concerto exclusivo que terá lugar antes de que finalice o presente ano.
Por outra banda, este evento gastronómico conta coa colaboración dos bodegueiros de Viños da Terra de Barbanza e Iria, propoñendo maridar os petiscos cos seus caldos.
Esta iniciativa impulsada pola Mancomunidade de Municipios Arousa Norte continuará na Pobra do Caramiñal (22, 23 e 24) e concluirá en Ribeira (29 e 30 de novembro e 1 de decembro).
