Gastronomía, viños e actividades no + que tapas

06 Novembro 2019
Cedida

A Mancomunidade de Municipios Arousa Norte vén de presentar a quinta edición da ruta + que tapas. Trátase dun evento gastronómico no que participan establecementos hostaleiros dos concellos de Ribeira, A Pobra do Caramiñal, Boiro e Rianxo. No acto estiveron presentes o presidente da Mancomunidade e alcalde de Boiro, José Ramón Romero; o rexedor de Rianxo, Adolfo Muíños; o concelleiro ribeirense de Relacións Institucionais, Turismo, Promoción e Dinamización Económica, Ramón Doval; o propietario do local boirense A Pousada da Galiza Imaxinaria, Suso Santamaría; Antonio Saborido e Francisco Crussat, bodegueiros de Viños da Terra de Barbanza e Iria, ademais de representantes da Fiestra Audiovisual.

Suso Santamaría, quen se encargou de organizar a ruta de tapas, manifestou que a convocatoria deste ano incorpora novidades. Así, esta edición celebrarase ao longo dunha fin de semana do presente mes en cada concello, comezando en Boiro (8, 9 e 10), continuando en Rianxo (15, 16 e 17), pasando por A Pobra do Caramiñal (22, 23 e 24) e concluíndo en Ribeira (29 e 30 de novembro e 1 de decembro). Suso Santamaría apuntou que esta proposta “axuda a mover un pouco máis os negocios hostaleiros”, precisando que esta convocatoria case cuadriplica o número de participantes respecto ao ano pasado.

Nesta fin de semana, a ruta polo municipio boirense poderá realizarse a partir deste venres, en horario de 20.00 a 23.00 horas, así como o sábado e domingo, desde as 12.00 ata as 14.30 horas. Para a apertura do percorrido na xornada do 8 de novembro, os clientes terán a oportunidade de gañar unha entrada para o concerto de Wyoming & Los Insolventes, o cal terá lugar ese mesmo día, a partir das 23.00 horas, en A Pousada da Galiza Imaxinaria. Os outros dous engadidos desta proposta son a presenza do soumiller Juan Figueroa Treus, natural de Escarabote e residente en Vigo, quen aconsellará aos clientes os viños que poden acompañar con cada petisco; así como o acompañamento de Quico Cadaval polo itinerario hostaleiro contando historias sobre bares. Deste xeito, cada concello contará con diferentes actividades que dinamizarán a ruta.

O prezo da tapa establécese nos 2’50 euros e os establecementos de Boiro que toman parte nesta iniciativa son Puzzle, Ginlab, Casa Magán, Al Atlántica, A Batea de Juan, Kir´s, Barbantia, Tres Catorce e Puerto Victoria. En canto ao resto de municipios, os locais aínda están a tempo de adherirse.

No que respecta aos premios para os establecementos participantes a dinámica cambia respecto a edicións anteriores, pois non só se conta co voto do público, senón tamén de profesionais hostaleiros para escoller a tapa gañadora, sendo elixidos catro locais (un por cada concello). Neste senso, os premiados asistirán ao showcooking do Festival da Luz 2020, en Boimorto, onde poderán elaborar e amosar os petiscos galardoados ante os asistentes.

Así mesmo, o público da ruta pode participar nun sorteo de catro bonos gastronómicos e un concerto exclusivo que terá lugar antes de que finalice este ano.

Ademais, esta edición conta coa colaboración dos bodegueiros de Viños da Terra de Barbanza e Iria, propoñendo maridar os petiscos, que estarán elaborados a base de produto local, cos seus caldos  que harmonizan á perfección co peixe e  sabores iodados dos mariscos. Tamén haberá cervexa Mahou, polo que toda aquela persoa que acompañe a súa tapa cunha destas bebidas, terá asegurada a invitación a unha segunda consumición.

Francisco Crussat expresou o seu agradecemento por esta iniciativa, xa que “sei o difícil que é vender viño na nosa terra”, vendendo tres veces máis fóra de España que na comarca, polo que aproveitarán estas propostas para dar a coñecer os seus caldos e a viticultura.

Na súa intervención, o edil ribeirense Ramón Doval destacou que a ruta sirve para “poñer en valor os nosos viños, os nosos caldos, que aquí temos presentes, e as tapas que poden presentar os nosos restauradores”, contribuíndo a dinamizar o sector hostaleiro.

Pola súa parte, o alcalde de Rianxo, Adolfo Muíños, salientou o valor engadido que supón a presenza dos bodegueiros desta comarca e o acompañamento de actividades culturais, ademais de puntualizar que “coincide nunha época realmente boa, por exemplo, no caso de Rianxo, que é a vindeira fin de semana, abriuse o Bou de Vara, o que permite que haxa un subministro tamén de zamburiñas ou chopo.”

Por último, o presidente da Mancomunidade e rexedor de Boiro, José Ramón Romero, informou de que o restante de ano estará cargado de citas. Da mesma maneira, anunciou que, co obxectivo de atraer a xente dos arredores, desenvolveranse actos da presentación de produtos nos mercados de abastos de Santiago e Pontevedra porque “son dous polos de turismo consagrados en Galicia e imos estar alí para presentar os nosos produtos e que veñan a visitar a nosa comarca, poñela en valor e estamos cargados de actividades culturais.” En canto a este último aspecto, avanzou que se está traballando nunha páxina web conxunta dos catro municipios de Arousa Norte para reunir as numerosas propostas que ofrecen.

Outros artigos

Publicidade

Revista en papel

Opinión

“La profesionalidad del Gobernador”. José Castro López

“La profesionalidad del Gobernador”. José Castro López

El Gobernador del Banco de España finalizó el mandato y Pablo Hernández de Cos sedespidió con la elegancia de un caballero y con la profesionalidad del eminenteeconomista después de seis años al frente de una institución clave para la economía y elsistema financiero...