Hoxe, na Biblioteca da Cidade da Cultura en Santiago, déronse a coñecer os galardóns dos Premios da Cultura Galega que concede cada ano o Goberno autonómico. As persoas, entidades e contribucións culturais distinguidas nesta edición resultaron ser o historiador e académico Xesús Alonso Montero, a artista noiesa Soledad Penalta, a agrupación Monicreques de Kukas, o músico Amancio Prada, a serie de televisión O sabor das margaridas, a profesora do IES da Pobra Pilar Ponte Patiño, os traballos de restauración do Pórtico da Gloria e o programa Galego en Londres.
Foron recoñecidas e recoñecidos nas modalidades de Letras, Artes Plásticas, Artes Escénicas, Música, Audiovisual, Lingua, Patrimonio Cultural e Proxección Exterior, respectivamente, por un xurado que estivo presidido polo conselleiro de Cultura e Turismo, Román Rodríguez.
Como dixemos, dous dos galardóns teñen relación directa coa nosa terra: o de Soledad Penalta, natural de Noia, e o de Pilar Ponte Patiño, profesora de Pobra do Caramiñal.
Soledad Penalta
A artista e escultora Soledad Penalta fíxose co Premio da Cultura Galega de Artes Plásticas. Comezou a súa carreira en 1972 traballando coa cerámica e desenvolveu o seu traballo en obradoiros e seminarios con mestres como Isaac Díaz Pardo. Formouse na Escola de Oficios Artísticos da Coruña (1976-1980). Na década de 1990 comezou a traballar con fundicións en bronce, ferro e aceiro, salientando as esculturas de gran formato para exterior como as que están expostas no parque escultórico da Torre de Hércules, no paseo marítimo da Coruña.
Desde o ano 2018 forma parte, como académica numeraria, da Real Academia Galega de Belas Artes. Participou en diversas mostras individuais e colectivas e ten obras en diversos museos como o Museo Bello Piñeiro, en Ferrol e no Museo de Arte Contemporánea de Cerámicas O Castro, en Sada, entre outros.
Pilar Ponte Patiño
Na categoría de Lingua a premiada resultou ser Pilar Ponte Patiño, profesora do IES da Pobra do Caramiñal de Lingua e Literatura Galegas que, no ano 2012, creou no centro docente onde imparte clases o proxecto 21 días co galego, co que anima as mozas e mozos do instituto a se expresar en galego durante tres semanas, todo o día e con todo o mundo, “actuando así a prol do idioma nun tramo de idade vital para o futuro da lingua e no que o proceso de substitución lingüística polo castelán se acelerou notablemente nos últimos anos”, salientou o xurado, engadindo que a docente creou a iniciativa co obxectivo de que o alumnado da Pobra do Caramiñal acadase “unha maior competencia na lingua do país e unha mellor conciencia lingüística a través de actividades variadas, sempre concibidas para levar o idioma sobre todo a aqueles eidos onde nunca estivera na vida dunha parte importante dos e das adolescentes”. Desde 2014 é un proxecto de centro que implica a todo o alumnado de ESO e bacharelato. No ano 2015 recibiu o Premio á innovación educativa en normalización lingüística.
