Con motivo da vixésimo primeira edición das Xornadas de Homenaxe a Valle-Inclán, A Pobra do Caramiñal foi escenario este mediodía dunha ofrenda cívica, amenizada polo grupo de música tradicional Os Caraveiros, e que incluíu ofrenda floral fronte ao busto do escritor situado nos xardíns que levan o seu nome, chantado da camelia xapónica creada por Begoña Franco en honor ao intelectual e lectura pública de textos seus nos que se alude a esta especie botánica.
No acto estiveron presentes a concelleira de Cultura, Patricia Lojo; o director xeral de Políticas Culturais, Anxo M. Lorenzo; o director do Museo Valle-Inclán, Antonio González; os edís Estefanía Ramos e José Andrés Lojo; o ex-voceiro do BNG local, Ramiro Ouviña; Xaquín del Valle-Inclán, neto do escritor; Begoña Franco, creadora da variedade de camelia; e veciñanza que se quixo achegar. Ademais, houbo representación do outro lado da ría tan vinculado con Valle-Inclán, concretamente, Vilanova de Arousa, asistindo o rexedor Gonzalo Durán e o tenente de alcalde Javier Tourís.
Xaquín del Valle-Inclán foi o encargado de ler referencias á especie botánica na obra do intelectual, mentres que Begoña Franco expresou a súa felicidade polo chantado desta camelia, constituíndo “un gran honor.”
Na súa intervención, o director xeral de Políticas Culturais destacou o traballo dos concellos valleinclanianos, “os que, ao longo de todos estes anos, son quen de manter con moita máis forza a lembranza e o traballo ao redor de Valle-Inclán.”
Pola súa parte, o alcalde vilanovés Gonzalo Durán manifestou que “Vilanova e A Pobra, A Pobra e Vilanova, somos concellos hermanados, difundimos a obra dun dos mellores dramaturgos que deu este país e que deu Europa.”
Finalmente, a concelleira pobrense Patricia Lojo reproduciu as palabras pronunciadas no seu día por Alfonso Rodríguez Castelao: “don Ramón era un galego extraordinario, o mellor artista que pariu Galicia.” Tamén engadiu que, en canto aos autores clásicos, os representantes públicos “temos o deber ético e estético de promover o seu coñecemento e divulgar as súas excelencias artísticas.”
