Segundo anuncio publicado hoxe no Boletín Oficial do Estado (BOE), a Demarcación de Costas de Galicia abre o prazo para a solicitude de autorizacións para os servizos de tempada de praia do ano 2020 (instalacións expendedoras de bebidas, hidropedais, hamacas, terrazas, servizos de escolas de surf, bodyboard, longboard, paddle surf, etcétera).
O prazo para solicitar tales autorizacións conclúe o 27 de decembro, realizándose a tramitación a través dos Concellos. A autorización que outorgue a Demarcación non exime en ningún caso de obter cantos títulos ou licenzas se precisen noutros organismos ou administracións públicas competentes.
En cada Concello estará dispoñible o modelo de instancia que deberá empregarse e a información sobre a duración das autorizacións, taxas aplicables, fianzas e restos de bases e condicións. En Ribeira, esta instancia estará dispoñible na Oficina de Atención Cidadá, situada no andar baixo do Consistorio.
