20191008. O BNG boirense levará a pleno a municipalización do complexo deportivo de A Cachada, pois manifesta que vén demandando isto “de maneira reiterada nos últimos anos”, ao entender que o actual modelo de explotación deste espazo por parte da empresa “ademais de resultar deficiente conta cun importante custe anual ás arcas municipais que non se ve repercutido nin en melloras nas instalacións nin en beneficio da cidadanía.”
A formación nacionalista tamén precisa que esta cuestión foi levada a pleno por parte do grupo municipal do PSdeG-PSOE, actual goberno local, sendo o presente tenente de alcalde quen requiría a municipalización do servizo.
Deste xeito, o Bloque indica que “sorprende, pois, que unha das primeiras decisións do goberno municipal do PSdeG-PSOE sexa optar por realizar unha nova inversión no complexo deportivo sinalado e non a de adoptar as medidas necesarias para xestión pública do mesmo.” Incluso apunta que se pon en mans da empresa privada que o xestiona na actualidade “unha importante inversión con cartos municipais sen solicitar, nin sequera á mesma, garantías dun mellor funcionamento, e isto a pesar das reiteradas queixas dos usuarios e usuarias da instalación.”
Por todo isto, solicita a adopción de acordos que inclúe instar ao goberno municipal a que, “en cumprimento do seu programa, adopte as medidas necesarias de cara ao inicio do expediente de municipalización do complexo deportivo da Cachada”, así como a suspensión de calquera inversión “que teña como finalidade a ampliación da infraestrutura municipal en tanto non se proceda á súa municipalización, limitándose a realizar no Complexo Deportivo da Cachada aquelas actuacións que teñan como único obxectivo o seu mantemento e sexan imprescindibles para que os usuarios e usuarias da mesma poidan facer un uso destas conforme ao que sería un correcto funcionamento do servizo.”