O Pai Andrés Díaz de Rábago homenaxeado na Pobra do Caramiñal

20191021. O salón de plenos do Concello da Pobra do Caramiñal acolleu o acto de recibimento e homenaxe á figura do Pai Andrés Díaz de Rábago (A Pobra do Caramiñal, 1917), quen reside en Taiwán desde hai cincuenta anos.

O alcalde da Pobra, Xosé Lois Piñeiro, acompañado da concelleira Patricia Lojo, destacou o seu labor altruísta, “impresionando por onde vai co seu carácter afable, coa súa forza, coa súa vitalidade.”

Pola súa parte, Díaz de Rábago afirmou estar “encantado” de encontrarse na súa vila, pois nunca se esqueceu da súa orixe nin do Nazareno. Respecto disto último, manifestou que se emocionou ao ver, na igrexa de Santiago da Pobra do Deán, a pía na que o bautizaron a tarde do 3 de outubro de 1917. Así mesmo, apuntou que naceu na casa de José Ramón Mariño, coñecida actualmente como casa de Faustino.

Orgulloso de dicir que “nunca deixei de ser da Pobra do Caramiñal”, incluso se atreveu a interpretar os versos dunha canción.

A continuación, o rexedor e a edil fixéronlle entrega dun agasallo consistente nunha medalla de edición única de Valle-Inclán, ao que o homenaxeado respondeu dando as grazas e precisando que tivo a oportunidade de falar co intelectual no seu día, engadindo que “Valle-Inclán é unha personalidade que merece ser recordada.”