A Pousada da Galiza Imaxinaria, a capital barbanzá da música independente, vai ofrecernos unha fin de semana de creatividade musical de primeira liña. A mestura de estilos e o espírito argalleiro arredor da música, un proceso en continuo espallamento, é a base de Dakidarría, a banda galega de ska, punk e reggae, con centro de operacións no Val Miñor pero con punto de mira no mundo. O concerto de Dakidarría no local de Boiro será este venres ás 23.00 horas, ao prezo de 10 euros na billeteira.
A banda, en palabras da Pousada, “é un dos grupos da nosa terra que máis está dando que falar dentro do panorama estatal”, logo de importantes traballos discográficos como Utopías emerxentes ou Filosofía incendiaria, das súas xiras pola Península, Europa e parte de América, e dos seus contundentes e impactantes directos, un dos seus principais puntos fortes.
A festa, este ir a máis da traballa rockeira galega, será un punto sen retorno ao día seguinte, o sábado 26, co concerto (tamén na Pousada de Boiro) de The Lákazans e de Blues & Decker. Comezará ás 22.00 horas.
The Lákazans, para quen non o saiba, foron os gañadores do Premio Martín Códax da Música 2018 na categoría de jazz, funk e blues, polo seu álbum Sandwina. É unha banda galega de R&B, soul e xéneros afíns, referentes en Galicia e España con todo o que teña ver coa mellor da música negra das pasadas décadas. Co seu último traballo inspirado na muller máis forte do mundo, amplían o seu rexistro a novos xéneros da música americana, máis aló do blues.
Polo que se refire a Blues & Decker, é unha agrupación asturiana que comezou abeirada ao blues rock clásico, pero que, sen abandonar a devoción pola música negra, foi asimilando sons modernos e arriscados, sons de renovación. Segundo reflicten dende A Pousada, os espectáculos de Blues & Decker beben da tradición narrativa dos bluesmen e do poder guitarreiro que enarboran desde o seu mesmo nome, “pero neste nove anos de traxectoria non deixaron de cultivar a versatilidade que lles permite adaptarse a toda clase de situacións”.
